Жолдар қашанда экономиканың күретамыры болып саналады. Әсіресе, Шымкент секілді жылдан-жылға дамып, қанатын кеңге жая бастаған қала үшін сапалы жолдар мен дамыған инфрақұрылым мәселесі өте маңызды. Сондай-ақ сапалы инфрақұрылым туризмді дамытуға да жол ашатыны белгілі.
Биыл бұл бағытқа 33 млрд теңге бөлініп отыр. Бұл қаржыға 18 нысанда құрылыс және қайта құру, тағы 160 көшеде күрделі және орташа жөндеу жұмыстары жүргізілуде. Нәтижесінде, Шымкенттегі жақсы және қанағаттанарлық жағдайдағы жергілікті маңызы бар автожолдардың үлесі 63,6 пайызға дейін көтерілген. Соңғы үш жылда, биылды қоса есептегенде 853,5 шақырым жол төселген. Тұрғындар бұрын мұнша жолдың 10 жылда салынғанын жақсы біледі.
Шаһардың көлік инфрақұрылымын сөз еткенде Д.Қонаев даңғылы мен Т.Рысқұлов көшесінің қиылысында салынып жатқан заманауи жолайрықты айналып өту мүмкін емес. Жақында Д.Қонаев даңғылындағы тоннель бөлігі пайдалануға берілді. Бұл нысандағы құрылыс жұмыстары жыл соңына дейін толық аяқталады. Одан бөлек, 590 жаңа автобус сатып алынып, қаладағы қоғамдық көліктер толығымен электрондық билет жүйесімен қамтылды.
Сондай-ақ қаланың тарихи, туристік нысандарға апарар жолдардың да сапасына көңіл бөлінуде.
