Қағаз бен қағаз өнімдері өндірісінің басым бөлігін картон-қағаз өнеркәсібі құрайды. Қазақстан орманға бай емес. Қазіргі уақытта картон-қағаз өндіретін өнеркәсіптер шикізат ретінде қайта өңделген қағаз бен картондық макулатураны қолданады.
Статистикалық мәліметтерге сүйенетін болсақ
2015-2019 жылдары қағаз бен қағаз өнімдері өндірісі айтарлықтай артқан. Өндіріс көлемі 45 млрд теңгеден 66,8 млрд теңгеге өскен. Көңіл аударарлық бір қызық дерек бар. Қазақстандағы қағаз өңдеуші кәсіпорындардың дені дәретхана қағазын көптеп шығарады. Яғни, сұраныс көп. Қағаздың осы түрінің өндірісі бір жылда 30%-ға өсіпті. Бұдан бөлек, гигиеналық қағаз сүлгілерді шығару 14%-ға ұлғайған.
Біздегі қағаз өндірісінің 80%-ы негізгі төрт өңірге тиесілі: Алматы облысы (20,8 млрд теңге, 31,2%), Алматы қаласы (17,5 млрд теңге, 26,2%) ШҚО (8,3 млрд теңге, 12,4%) және Шымкент қаласы (7,6 млрд теңге, 11,4%). Бұл қағаз және картон өндірісі бүгінде инновациялық жобаларды қолға алып, түрлі кәсіпорындар көптен ашылып жатқан үшінші мегаполисте де дамып келеді деген сөз.
Келесі жылы Шымкент қаласында қағаз және картон өндіретін тағы бір кәсіпорынның лентасы қиылмақ. "Оңтүстік" арнайы экономикалық аймақта жүзеге асқалы жатқан жобаның құны 1060 миллион теңгені құрайды. Кәсіпорынның аумағы 5,8 га. Өндіріс орны ашылған кезде 25 адамды тұрақты жұмыспен қамтымақ. Кәсіпорын өнімдерін жергілікті және шетелдік нарыққа шығаруды жоспарлап отыр.
