Киберқауіпсіздік бойынша сарапшы Евгений Питолин "Хабар 24" телеарнасына Kaspi.kz-пен болған жағдайларда не істеу керегін түсіндірді.
Халықаралық антивирус компаниясының басқарушы директорының сөзінше, ең алдымен мұндай жағдайларда банк бағдарламасына немесе сайтқа қайта-қайта кіре берудің қажеті жоқ, бұл мамандарға ақауды реттеуге кедергі келтіреді.
Сондай-ақ сарапшы шабуыл жасалғаны және картадағы ақшаның жоғалып кеткені туралы хабарламаларды таратпауға кеңес берді. Мұндай сәтте адамдарда үрей туып, интернет-алаяқтар бұл жағдайды тиімді пайдаланып кетуі мүмкін.
Питолин Kaspi.kz-пен болған жағдайларда қолданушылар сабыр сақтап, мамандарға жағдайды реттеуге уақыт беру керегін айтады. Оның айтуынша, мұндай техникалық ақау кез келген қаржы саласында болуы мүмкін.
